Purtret

La Societad da musica Trun ei vegnida fundada egl onn 1864 da siat umens dil vitg da Trun. Oriundamein veva quella societad num „cumpignia da musicants Trun“. Igl emprem concert documentau ha giu liug igl onn 1914 el hotel Tödi.

L’emprema uniformaziun ei stada 5 onns suenter che Trun ha saviu festivar 500 onns dapi la fundaziun dalla Ligia Grischa (1424). Il meister cusunz Anton Riedi ha fatg quella emprema uniforma. Da jez temps per 23 musicants.Suenter la Secunda uiara mundiala ei la musica carschida considerablamein aschia ch’ei ha dau igl onn 1951 la secunda uniformaziun per 44 musicants. El medem onn, mo era els proxims ha la societad da musica Trun giu differents gronds success sin fiastas. Quei ei stau il meret d’il componist indigen Eduard Lombriser. El ha aunc inaga slargiau las retschas ella musica cun cuors per giuvenils.

Igl onn 1960 ei Carli Scherrer vegnius successur e spert fatg in num remercabel egl entir Grischun. Ils onns siatonta ha ei dau la tiarza uniformaziun nova. Quella ga dil pictur-artist Aluis Carigiet. Cul niev tschentaner ha ei lu dau zacontas midadas ella musica. Muort munconza da commembers mo era sco experiment musical ei vegniu priu si ella musica saxofons e clarinettas.